Кўзимдан кўзларинг оласан нечун?

Наҳот айтар ўзинг бўлди ниҳоя…
Бугун сен мени тарк этишинг учун,
Битта баҳона-ю, бир сўз кифоя…
Айрилиқ бизларга солмоқда учқун,
Севгимиз бўлмоқда аччиқ ҳикоя…
Бугун унга яъкун ясашинг учун,
Битта баҳона-ю, бир сўз кифоя…
Бунчалар ўзгардинг, не сабаб бўлди,
Қалбингга нималар солмоқда соя…
Аламдан кўзларинг нафратга тўлди,
Кечишингга бир сўз бўлар кифоя…
Кетишга сабаблар излайсан ҳануз,
Ҳатто сўзларингдан қулайди қоя…
Тутиб қололмайман қўлларинг афсус,
Кетишингга бир сўз етар, кифоя…